Քանյեի՝ ցենզուրայից դուրս Ցենսորին, Բեյոնսեի հաղթանակն ու Սվիֆթի պարտությունը. Գրեմմի 2025-ը՝ մերկությունից մինչև քաղաքականություն
Լոս Անջելեսում կայացավ «Գրեմմի» մրցանակաբաշխության 67-րդ արարողությունը: Այս անգամ միջոցառումն անցավ քաղաքը ավերած անտառային հրդեհների թողած ֆիզիկական, տնտեսական, հոգեբանական և էմոցիոնալ ազդեցության ներքո: Սակայն, ինչպես ասում են՝ show must go on, և այս երեկոն, ինչպես և կանխատեսվում էր, վերածվեց իսկական շոուի՝ իր հաղթանակներով, սկանդալներով ու անակնկալներով:
ԲԵՅՈՆՍԵԻ ՊԱՏՄԱԿԱՆ ԳԻՇԵՐԸ
Երեկոյի գլխավոր հերոսուհին, անկասկած, Բեյոնսեն էր: Երգչուհին վերջապես հասավ նրան, ինչին, շատերի պնդմամբ, արժանի էր վաղուց․ նա առաջին անգամ հաղթեց «Տարվա ալբոմ» անվանակարգում իր Cowboy Carter ալբոմով: Ավելին, նա դարձավ առաջին սևամորթ կին արտիստը, ով արժանացավ այս մրցանակին 21-րդ դարում: Երգչուհին բեմ բարձրացավ դստեր՝ Բլու Այվիի հետ, և շնորհակալություն հայտնեց բոլոր հեղինակներին ու պրոդյուսերներին իրենց կատարած աշխատանքի համար:
Հետաքրքիր զուգադիպությամբ, մրցանակը նրան հանձնեց Թեյլոր Սվիֆթը՝ նույն այն երգչուհին, ում տարիներ առաջ Քանյե Ուեսթն ընդհատեց՝ պնդելով, որ մրցանակին արժանի էր Բեյոնսեն: Այս անգամ Բեյոնսեն ոչ միայն վերցրեց գլխավոր մրցանակը, այլև դարձավ առաջին սևամորթ արտիստը, ով հաղթեց «Լավագույն քանթրի ալբոմ» անվանակարգում: Մեկ բեմում Բեյոնսեի ու Թեյլորի ջերմ հանդիպմանը միայն մի բան էր պակասում, ու ակնհայտորեն շատերն էին սպասում, որ ինչ-որ տեղից Քանյեն այդ պահին կհայտնվի բեմում։
Queen B-ն նախկինում չորս անգամ առաջադրվել էր «Տարվա ալբոմ» անվանակարգում իր Beyoncé, Lemonade և Renaissance ալբոմների համար, որոնք բարձր գնահատականի էին արժանացել և՛ քննադատների, և՛ հանդիսատեսի կողմից, բայց միայն հինգերորդ անգամ՝ Cowboy Carter-ով կարողացավ հասնել այս տիտղոսին։ Բեյոնսեն իր ելույթում անդրադարձավ նաև երաժշտական ժանրերի սահմանափակումներին:
«Ժանրն ինչ-որ կոդային, արգելող բառ է, որպեսզի մենք՝ արտիստներս, իմանանք մեր տեղը: Բայց ես պարզապես ուզում եմ խրախուսել մարդկանց անել այն, ինչ իրենք սիրում են»։
Այս տարվա «Գրեմմին» մի շարք ռեկորդներ գրանցեց: Բեյոնսեն դարձավ ամենաշատ «Գրեմմի» ունեցող արտիստը՝ 35 մրցանակով: «Գրեմմի 2025»-ն առանձնահատուկ էր Բեյոնսեի համար ոչ միայն հաղթանակներով, այլև ռեկորդային թվով առաջադրումներով: Երգչուհին արժանացել էր 11 առաջադրման, ինչով հավասարվեց պոպ երաժշտության արքա Մայքլ Ջեքսոնի ռեկորդին՝ մեկ ալբոմի համար առաջադրումների քանակով: Ջեքսոնը նման ցուցանիշի հասել էր իր լեգենդար Thriller ալբոմով:
Ուր գնալ, ինչ անել՝ Իդրամի հետ
Իհարկե, վերջին շրջանում Բեյոնսեի անունը կապվում է հնարավոր ու անհնարին բազմաթիվ սկանդալների և հանցագործությունների հետ, ու սա անտեսելը շատ դժվար էր։ Համացանցում անգամ տեսանյութեր էին պտտվում, թե արտիստներն իրենց հաղթանակներից հետո ստիպված են շնորհակալություն հայտնել Բեյոնսեին, որովհետև վախենում են հետևանքներից։ Երեկոյի ընթացքում Մայլի Սայրուսը, որը ներկայացնում էր «Տարվա ձայնագրություն» անվանակարգը, խոսեց համացանցի օգտատերերի անունից ու համարձակ կատակ արեց Բեյոնսեի հասցեին։
«Ձայնագրման ակադեմիայի 13 հազար քվեարկողների ընտրությամբ՝ Գրեմմին բաժին է հասնում... Նույնիսկ եթե դա դու չես՝ Բեյոնսե, ես կարող եմ պարզապես ասել, որ դա դու ես»:
ԵՐԵԿՈՅԻ ՄՅՈՒՍ ԱՍՏՂԵՐԸ
Եթե Բեյոնսեն երեկոյի թագուհին էր, ապա Քենդրիկ Լամարը՝ անվիճելի թագավորը: Ռեփերը հաղթեց բոլոր հինգ անվանակարգում, որոնցում առաջադրված էր իր Not Like Us երգով: Նա ստացավ «Տարվա երգ», «Տարվա ձայնագրություն», «Տարվա ռեփ կատարում», «Լավագույն ռեփ երգ» և «Լավագույն տեսահոլովակ» մրցանակները:
«Մենք այս մրցանակը նվիրում ենք քաղաքին», - հայտարարեց Լամարը՝ թվարկելով Լոս Անջելեսի թաղամասերը: Հատկանշական է, որ Not Like Us-ը դարձավ երկրորդ հիփ հոփ սինգլը, որը հաղթեց «Տարվա ձայնագրություն» անվանակարգում՝ This Is America-ից հետո:
Մրցանակաբաշխության ամենամեծ անակնկալներից էր Թեյլոր Սվիֆթի լիակատար պարտությունը: Երգչուհին, որ ներկայացված էր վեց անվանակարգում և համարվում էր միջոցառման ֆավորիտներից մեկը, ոչ մի մրցանակ չստացավ: Իրավիճակն առավել հեգնական էր դարձնում այն, որ հենց Սվիֆթին էր վիճակված հանձնել Բեյոնսեին «Լավագույն քանթրի ալբոմ» մրցանակը։ Ի դեպ, առանց մրցանակների և թաց աչքերով տուն գնաց նաև Բիլլի Այլիշը։
Երեկոյի գլխավոր հաճելի անակնկալներից էր The Weeknd-ի կատարումը: Երգիչը, որը 2020 թվականից բոյկոտում էր մրցանակաբաշխությունը, առաջին անգամ ելույթ ունեցավ՝ կատարելով Timeless և Cry For Me երգերն իր նոր՝ Hurry Up Tomorrow ալբոմից: Նրա վերադարձը խորհրդանշական էր․ The Weeknd-ը ժամանակին Twitter-ում գրել էր, որ «Գրեմմին շարունակում է կոռումպացված մնալ»:
Երեկոյի ամենահուզիչ պահերից էր Լեդի Գագայի և Բրունո Մարսի դուետը: Նրանք կատարեցին California Dreamin' երգը՝ նվիրված Լոս Անջելեսին: Հետագայում զույգը հաղթեց «Լավագույն փոփ դուետ» անվանակարգում Die With a Smile երգով:
St. Vincent-ը երեկոյի ընթացքում ավելացրեց ևս երեք «Գրեմմի» իր հավաքածուին՝ հասցնելով դրանց ընդհանուր թիվը վեցի: Charli XCX-ը նույնպես փայլուն երեկո ունեցավ՝ ստանալով իր առաջին երեք «Գրեմմիները»։ Սաբրինա Կարպենտերը ևս փայլեց երեկոյի ընթացքում՝ հաղթելով «Լավագույն վոկալ փոփ ալբոմ» անվանակարգում Short n' Sweet ալբոմով: Նա նաև ստացավ «Լավագույն սոլո փոփ կատարում» մրցանակը Espresso երգի համար:
Պատմական պահերից էր The Beatles-ի հաղթանակը «Լավագույն ռոք կատարում» անվանակարգում Now and Then երգով, որը ստեղծվել էր արհեստական բանականության օգնությամբ՝ օգտագործելով 1960-ական թվականների ձայնագրությունը: Մրցանակը ստանալու համար բեմ բարձրացավ Ջոն Լենոնի որդին՝ Շոնը:
«Սա բոլոր ժամանակների լավագույն խումբն է: Նվագեք Beatles ձեր երեխաների համար: Աշխարհը չի կարող թույլ տալ մոռանալ այս երաժշտությունը»:
Doechii-ն հաղթեց «Լավագույն ռեփ ալբոմ» անվանակարգում Alligator Bites Never Heal ալբոմով՝ դառնալով երրորդ կին ռեփերը, որ արժանացել է այս մրցանակին Լորեն Հիլից և Քարդի Բի-ից հետո: Նա իր ելույթը նվիրեց սևամորթ կանանց.
«Ես ուզում եմ ասել ձեզ՝ ամեն ինչ հնարավոր է: Թույլ մի տվեք ոչ ոքի ձեզ վրա բարդել կարծրատիպեր, որոնք ստիպում են մտածել, թե ձեր տեղն այստեղ չէ»:
ԱՅՆ, ԻՆՉ ԿԱՊ ՉՈՒՆԵՐ ԵՐԱԺՇՏՈՒԹՅԱՆ ՀԵՏ
«Գրեմմին» չէր լինի «Գրեմմի» առանց սկանդալի, և այս անգամ դրա հեղինակը կրկին ու կրկին Քանյե Ուեսթն էր՝ այս անգամ կնոջ՝ Բյանկա Ցենսորիի հետ միասին: Մեր նախկին փեսայի նոր կին Ցենսորին ցենզուրայից դուրս հագուստով էր ժամանել մրցանակաբաշխությանը։ Կամ, բացարձակապես չափազանցված չի լինի ասել՝ առանց հագուստի։ Բյանկան, որ հայտնի է իր էպատաժային կերպարներով, նախ հայտնվեց մուշտակով, որը հետո հանեց՝ ցուցադրելով իր մերկ մարմինը՝ թափանցիկ զգեստի տակ:
Այս դրվագը դարձավ երեկոյի ամենաքննարկվող թեմաներից մեկը, հատկապես, երբ զույգը չհայտնվեց բուն արարողությանը: Տարբեր աղբյուրներ տարբեր պատճառներ են նշում․ ոմանք պնդում են, թե նրանց չեն թողել ներս մտնել, մյուսները՝ որ իրենք են հեռացել:
Վերադառնալով այլ թեմաների։ Այս տարվա «Գրեմմին» անցավ քաղաքը տակնուվրա արած անտառային հրդեհների ստվերի ներքո: Թրևոր Նոան բացման խոսքում նշեց.
«Ընդամենը մի քանի շաբաթ առաջ մենք վստահ չէինք, որ այս շոուն կկայանա: Այսօր մենք ոչ միայն տոնում ենք մեր սիրելի երաժշտությունը, այլև մեծարում ենք քաղաքը, որը մեզ այդքան երաժշտություն է պարգևել»:
Երեկոն հագեցած էր նաև քաղաքական ենթատեքստ ունեցող ելույթներով: Շակիրան, ստանալով իր չորրորդ «Գրեմմին» Las Mujeres Ya No Lloran ալբոմի համար, իր հաղթանակը նվիրեց ԱՄՆ-ում բնակվող ներգաղթյալներին.
«Ես ուզում եմ նվիրել այս մրցանակն իմ բոլոր ներգաղթյալ եղբայրներին ու քույրերին այս երկրում: Ձեզ սիրում են, դուք արժանի եք, և ես միշտ կպայքարեմ ձեզ հետ միասին»:
Բեյոնսեի պատմական հաղթանակը, Քենդրիկ Լամարի հաջողությունը, The Weeknd-ի վերադարձը, Քանյեի կինը, քաղաքական ուղերձներն ու շատ այլ դրվագներ 67-րդ «Գրեմմի» մրցանակաբաշխությունը, վստահաբար, հիշարժան դարձրին։ Իսկ որ ամենակարևորն է՝ միջոցառման ժամանակ հավաքվեց 7 միլիոն դոլար՝ հրդեհից տուժածներին օգնելու համար: