💸 #ֆինանսաPAN Weekly (108)

Ֆինանսական շաբաթը՝ EasyPay-ի հետ

🇦🇲  Եթե ձեր աշխատավարձը 50%-ով աճում է, իսկ նույն գործով զբաղվող ձեր կոլեգայինը՝ 5%, միանգամից մի մտածեք, որ ձեզ ավելի շատ են գնահատում, նախ հիշեք, թե կոլեգան ձեզանից անգամներ շատ է վարձատրվում, ու կհասկանաք, որ թիվը %-ով ներկայացնելն ուղղակի մեծ աճի իմիտացիա է ստեղծում: Տարվա առաջին կիսամյակում Հայաստանից արտահանումը մոտ 50%-ով նվազել է՝ մեծամասամբ պայմանավորված Ռուսաստանից ներմուծվող ու դեպի ԱՄԷ վերաարտահանվող ոսկու ծավալների և դեպի Չինաստան արտահանման կրճատման հաշվին: Սակայն եթե դիտարկենք առանձին ապրանքատեսակների արտահանումը, կարող ենք մեծ աճեր «ցույց տալ». Օրինակ՝ դեպի ԵՄ պատրաստի սնունդի արտահանման 56% աճ (սակայն իրականում արտահանումն աճել է ընդամենը $1 մլն-ով` $1.9 մլն-ից դառնալով $2.9 մլն) ալկոհոլային խմիչքների՝ 20%, կամ ալյումինե արտադրանքի 35% աճ՝ չնայած դեպի ԵՄ արտահանումն աճել է ընդամենը 4.5%-ով, որն ընդհանուր արտահանման նվազման ֆոնին կարելի է համարել ոչ նշանակալի… https://tinyurl.com/mrdxckzj

Այժմ՝ աշխարհում ուշագրավի մասին…

…ֆինանսներից

🍏  Apple-ը նախատեսում է առաջիկա 4 տարում ԱՄՆ արտադրության մեջ ներդնել $600 մլրդ՝ ներառյալ կիսահաղորդիչների արտադրության խթանման համար ծախսերը. Թրամփը «խոստացել է» նաև ընկերությանն ազատել ներմուծվող չիպերի վրա սահմանված 100% մաքսատուրքից՝ https://tinyurl.com/5n968djz

✂️  Labubu-ի պահանջարկի անկման պատճառով Pop Mart-ի բաժնետոմսերն օգոստոսից ընկել են ավելի քան 20%-ով, իսկ  հիմնադիր Վան Նինը $6 մլրդ-ով «աղքատացել է». կանխատեսվում է, որ 2026-ին ընկերության աճը դանդաղելու է՝ https://tinyurl.com/2mmpsvua

🧑‍💻  OpenAI-ն օգտագործում է Microsoft-ի սերվերները, ու մեծամասամբ դրա հաշվին ընկերության հետ կիսվում է իր եկամուտների մոտ 20%-ը. այս թիվն առաջիկա 5 տարում նախատեսվում է կրճատել մինչև 8%` https://tinyurl.com/2hzfn8n9

…տնտեսությունից

🛣️  Առաջին AI նախարարն է նշանակվել Ալբանիայում, ով պատասխանատու կլինի պետական գնումների ամբողջ գործընթացի համար. մնում է հուսալ, որ ճանապարհների ասֆալտապատման տենդերներում չեն հաղթի AI նախարարի քեռու տղաներն ու բաջանաղները՝ https://tinyurl.com/yss289jc

👠  Ըստ Ջորջիո Արմանիի կտակի, նրա նորաձևության կայսրությունը պետք է վաճառվի, իսկ առաջնային գնորդներ են լինելու ԼVMH-ն, L’Oréal-ը կամ EssilorLuxottica-ն. կտակը զարմացրել է շատերին, քանի որ Արմանին տարիներ շարունակ մերժում էր գնման ցանկացած առաջարկ` https://tinyurl.com/y4rpkxy8

🤝  ԱՄՆ-ն ու Չինաստանն էլ համաձայնության են եկել TikTok-ի ամերիկյան բիզնեսն ԱՄՆ վերահսկողության տակ անցնելու վերաբերյալ. սա որոշակիորեն մեղմում է ԱՄՆ անվտանգության մտահոգությունները՝ կապված իրենց օգտատերերի տվյալների հավաքագրման հետ՝ https://tinyurl.com/bjmnhr34

… ֆինտեխից

🏦  Klarna-ն դարձել է հրապարակային ընկերություն՝ $16 մլրդ շուկայական արժեքով. Այն ցանկանում է դուրս գալ «գնիր հիմա, վճարիր հետո» ծառայություններից և դառնալ խոշոր ֆինտեխ խաղացող՝ https://tinyurl.com/yrawpsce

💰  Իսկ դուք ի՞նչ ծավալի գնումներ եք անում անհպում վճարումներով. Միացյալ թագավորությունում ցանկանում են բարձրացնել առանց PIN կոդի գործարքների սահմանաչափը, սակայն մասնագետները պնդում են, որ կոդը հավաքելու փաստն էականորեն նվազեցնում է չպլանավորված գնումների ծավալը՝ https://tinyurl.com/ycxs88yb

🔗  PayPal-ը ներկայացրել է PayPal Links նոր համակարգը, որի միջոցով կարելի է գումար ուղարկել կամ պահանջել 10 օր ակտիվ ժամանակահատված ունեցող մեկանգամյա հղումով. այն ԱՄՆ-ում կաշխատի ոչ միայն դոլարի, այլև կրիպտոակտիվների համար՝ https://tinyurl.com/2s3rphdn

…կրիպտոյից

🪙  ԱՄՆ Դաշնային պահուստային համակարգը պատրաստվում է տարվա առաջին տոկոսադրույքի կրճատմանը, ինչի սպասումների ֆոնին Bitcoin-ը շարունակում է անկայուն մնալ $114-116,000-ի սահմաններում՝ https://tinyurl.com/45d4c5kf

📈  Իսկ Etherium-n ապրիլից մինչ օրս մոտ x3.5 թանկացել է, և այժմ այս կրիպտոյով կատարվող գործարքները հասել են ռեկորդային քանակի՝ օրական մոտ 1.7 մլն հատի՝ https://tinyurl.com/5rttykfn

⛏️  Ռուսաստանում առաջարկվում է ստեղծել պետական կրիպտո բանկ, որը հնարավորություն կտա օրինական ճանապարհով կանխիկացնել մայնինգից ստացված եկամուտները. ի դեպ՝ Ռուսաստանի կրիպտո մայնինգի ոլորտն աշխարհում ամենամեծերից է՝ https://tinyurl.com/y8w9v95r

🤟 Եվ հիշեք՝ ներդրումը ծառ տնկելու նման է. լավագույն ժամանակը 10 տարի առաջ էր, երկրորդ լավագույն ժամանակը՝ հենց հիմա~