💸 #ֆինանսաPAN (80)

Ֆինանսական շաբաթը՝ EasyPay-ի հետ

🇦🇲 Եթե ձեր ամուսինը չի դիմացել «սիրելիս, մեզ հարսանիք են հրավիրել, գումար է անհրաժեշտ նոր շորի, մեյքափի ու նվերի համար» մտքին կամ, 200,000 դրամ աշխատելով, նոր iPhone է վերցրել ու բանկին չի վճարել, իմացեք, որ փետրվարի 1-ից մեկնարկել է անհուսալի վարկեր ունեցող անձանց աջակցության ծրագիրը, ու արդեն 1000 հոգի հասցրել է դիմել դրան: Դիմեք, բայց հիշեք՝ անհրաժեշտ է, որ ձեր բոլոր վարկերի հանրագումարը 1 մլն դրամից պակաս լինի, ստուգեք, որ վարկն անպայման լինի ԿԲ կողմից լիցենզավորված բանկից կամ վարկային կազմակերպությունից, ու, Աստծո սիրուն, նոր iPhone դեռ մի գնեք… Աջակցության ծրագրին դիմել կարելի է այստեղ՝ https://e-social.am

Իսկ հիմա՝ աշխարհում ուշագրավի մասին…

… ֆինանսներից

🧠 Սաուդյան Արաբիան $14.9 մլրդ-ի ներդրում կկատարի արհեստական բանականության ոլորտում՝ գործակցելով ոլորտի խոշոր ներկայացուցիչների՝ Google, Lenovo, Alibaba-ի հետ. նպատակը տարածաշրջանային AI հաբ դառնալն է՝ https://tinyurl.com/87ccrc72

🏮 Լուրեր տարածվեցին, թե, ի պատասխան ԱՄՆ-ի, Չինաստանն էլ ԱՄՆ խոշոր տեխնոլոգիական ընկերությունների դեմ պատժամիջոցներ կկիրառի ու արդեն պատրաստում է ընկերությունների ցանկը. ըստ Չինաստանի կառավարության՝ երկիրը բոլորին հավասար աչքով է նայում, ոչ մի ցանկ էլ չկա՝ https://tinyurl.com/3fnzus3p

🔊 Բայց Թրամփը համեստություն չի անում, այժմ էլ հայտարարել է պողպատի և ալյումինի վրա 25% մաքսատուրքի մասին. ամենաշատը կտուժեն Կանադան ու Մեքսիկան՝ https://tinyurl.com/3axc46zm

… տնտեսությունից

💜 Հարևանին ամեն շաբաթ նոր մեքենայով տեսնելուց նախանձելուց առաջ իմացեք, որ Ռուսաստանում Wildberries-ով արդեն հնարավոր է օգտագործված ավտոմեքենա պատվիրել, այն էլ՝ վերադարձի հնարավորությամբ՝ https://tinyurl.com/65ymajy6

🚘 BYD-ն դարձել է 3-րդ ամենալավ վաճառվող ավտոմեքենաների բրենդը՝ Toyota-ից ու Volkswagen-ից հետո, 2023-ի համեմատ մոտ 40%-ով ավելացնելով վաճառքի ծավալները՝ https://tinyurl.com/3esdywhc

👨🏻‍💻 Իսկ ԱՄՆ-ում IT գործազուրկների քանակը մեկ ամսում 98,000-ից դարձել է 152,000. գործազրկության աճի թիվ մեկ մեղավորը (բայց ոչ պատասխանատուն) ճանաչվել է արհեստական բանականությունը՝ https://tinyurl.com/3w8zrvck

… ֆինտեխից

💳 Mastercard-ը կարծում է, որ AI-ը ֆինտեխերի համար, բացի ռիսկերից (հատկապես deepfake-երի կիրառումը), նաև հնարավորություններ է ստեղծել` ընդհուպ մինչև զեղծարարությունների կանխարգելման ավելի նորարար մոդելների օգտագործումը՝ https://tinyurl.com/mr3kfusx

👛 Շվեդական ֆինտեխ Klarna-ն ապրիլին սպասվող IPO-ին ընդառաջ հայտնել է, որ ինտեգրվելու է կրիպտո ոլորտի հետ ու օգտատերերին հորդորել իրենց հավելվածին կցել կրիպտո դրամապանակները՝ https://tinyurl.com/23ne7n5s

🇦🇪 Այս տարի խոշոր IPO-ի է պատրաստում նաև ԱՄԷ-ում հիմնված «գնիր հիմա, վճարիր հետո» ֆինտեխ Tabby-ն, որը տարածաշրջանի ամենախոշորն է՝ $10 մլրդ արժեքով՝ https://tinyurl.com/s46kcy3k

… կրիպտոյից

📈 Ընդհանուր 622,735 bitcoin ունեն խոշորագույն` բորսայում շրջանառվող այնպիսի ընկերություններ, ինչպիսիք են Microstrategy, Tesla, Galaxy Holdings ու ոչ միայն. սա կազմում է bitcoin-ի ծավալի մոտ 3%-ը՝ https://tinyurl.com/497xpree

👑 Եթե Coinbase կրիպտոբորսան բանկ լիներ, ապա կլիներ Ամերիկայում 21-րդ ամենամեծը՝ $420 մլրդ ակտիվների ծավալով. հանրային ընկերության բաժնետոմսերը շրջանառվում են Nasdaq ֆոնդային բորսայում՝ https://tinyurl.com/zk9b7kea

🌐 Ճապոնիան էլ Google-ին ու Apple-ին խնդրել է հեռացնել իրենց երկրում չգրանցված/չլիցենզավորված կրիպտոբորսաների հավելվածները՝ ուղղելով «եթե ուզում եք մեր շուկայում խաղալ, հետևեք մեր խաղի կանոններին» հորդորը՝ https://tinyurl.com/yvx9pvkc

🤟 Եվ հիշեք՝ միշտ ներդրում կատարեք ինքներդ ձեզ վրա, բայց իմացեք, որ ինքնազարգացումն ու Gucci-ի պայուսակը շատ տարբեր ներդրումներ են~