Հայկական վոյաժ. Մեր կինոսեր ընթերցողի այցելություններն ամերիկյան կինոյի կուլտային վայրեր
Ցանկացած կինոսիրողի համար սիրո մեծագույն դրսևորում է իր սիրելի ֆիլմերի հռչակավոր դրվագների հետ կապված վայրեր այցելելը: Նույն «Մատանիների տիրակալի» շնորհիվ, Նոր Զելանդիա այցելող զբոսաշրջիկների մի զգալի մասը այնտեղ են՝ Շիրը, Մորդորը ու Ռիվենդելն իրենց աչքերով տեսնելու համար: Հայաստանում նույնպես կան նվիրյալ կինոսիրողներ, ու նրանցից Արսեն Քիշմիրյանը Միացյալ Նահանգներում այցելել է իր սիրելի ֆիլմերի հետ կապված կուլտային վայրեր:
Արսենը PAN-ի հետ կիսվել է տպավորություններով ու լուսանկարներով:
Եղբայրս՝ Արմեն Քիշմիրյանը, տարեվերջի տոներին հրավիրեց ԱՄՆ՝ հանգստանալու, ու առաջարկեց ավտոմեքենայով շրջագայություն կազմակերպել Սան Դիեգոյից մինչեւ Սան Ֆրանցիսկո։ Միանգամից մտքովս անցավ այցելել մեր սիրած ֆիլմերի նկարահանման վայրերը, ինչը և արեցինք։ Բոլոր վայրերը գտել եմ movie-locations.com և նմանատիպ այլ կայքերից։ Ճանապարհորդությունը, որը, կարելի է ասել, մի մեծ արկած էր, տևեց 10 օր՝ Չիկագոյից ինքնաթիռով Սան Դիեգո, որտեղից էլ՝ ավտոմեքենայով Սան-Ֆրանցիսկո, իսկ ամենաերկար ժամանակը մնացինք Լոս Անջելեսում, ուր մեկնելու օրը արդեն երևում էին հրդեհի ծխի քուլաները:
ՉԻԿԱԳՈ
Այցելել Չիկագո ու չտեսնե՞լ լեգենդար «Տանը մենակ» (Home Alone, 1990) ընտանեկան կատակերգությունից Մքալիսթերների տունը. դա հանցագործություն կլիներ:
Այն գտնվում է 671 Lincoln Ave, Winnetka, IL 60093 հասցեով, Չիկագոյից մի փոքր քիչ հյուսիս ու հարուստների թաղամաս է։ Այցելեցինք հենց Նոր Տարվա նախօրեին։ Հետաքրքիր էր, որ փողոցային լապտերները լրիվ անջատված էին, փողոցները կորում էին մթության մեջ, բայց այ միլիոնանոց առանձնատները, լրիվ ֆիլմերի նման, զարդարված էին լույսերով։
Մի երկու փողոց այն կողմ կանգնեցինք և որոշեցինք ոտքով գնալ: Ականատես եղանք բավականին հետաքրքիր տեսարանի՝ մարդիկ իրենց մանկահասակ
երեխաների հետ բոլոր կողմերից ինչ-որ ուղղությամբ էին շարժվում: Հետևելով նրանց՝ հասանք տանը: Տունը լավ զարդարված էր, գրեթե բոլոր պատուհանների մոտ վառված մոմեր էին դրված: Ինտերնետում տեսել եմ, տունը որ վաճառքի է դրված:
Չնայած սիքվելի՝ «Տանը մենակ 2ю Նյու Յորքում կորածը» (Home Alone 2: Lost in New York, 1992) իրադարձությունները տեղի են ունենում Նյու Յորքում, որոշ հատվածներ նկարահանվել են նույն Չիկագոյում: Այսպես, Duncan's Toy Chest խաղալիքների խանութի ճակատային հատվածը ու ինտերիերը նկարել են Չիկագոյի տարբեր շինություններում:
Մասնավորապես, խաղալիքների խանութի ճակատային հատվածը Չիկագոյի 209 S La Salle St, Chicago, IL 60604 հասցեում գտնվող Rookery Building-ն է:
Չիկագոն այն Գոթեմ սիթին էր, որը տեսել ենք մութ ասպետի մասին Քիստոֆեր Նոլանի եռագրությունում: Մասնավորապես, «Մութ ասպետը» (The Dark Knight, 2008) ֆիլմում Wayne Enterprises-ի շենքը Chicago Board of Trade Building-ն է:
ՍԱՆ ՖՐԱՆՑԻՍԿՈ
«Հարցազրույց վամպիրի հետ» (Interview with the Vampire: The Vampire Chronicles, 1994) դրամայի հենց սկզբում վամպիր Լուին հանդիպում է լրագրող Դենիել Մոլոյին՝ հորինված St Martin's հյուրանոցում: Իրական շենքը գտնվում է Market Street ու Taylor Street խաչմերուկում՝ Սան Ֆրանցիսկոյի դաունթաունում:
Խնդրանք ընթերցողին. եթե լինես Սան Ֆրանցիսկոյում, մտիր 919 Kearny St հասցեում գտնվող House of Nanking ու իմ փոխարեն մի բաժակ օղորմաթաս խմիր «Մատրիցա. Վերածնունդներ» (The Matrix Resurrections, 2022) ֆիլմի համար: Այդտեղ կրկին հանդիպում են Նեոն եւ Տրինիտին:
ԼՈՍ ԱՆՋԵԼԵՍ
Տարանտինոյի սիրելի քաղաքը: «Քրեական ընթերցվածքում» (Pulp Fiction, 1994) Բուտչ Քուլիջըը դոնաթներով բեռնված Մարսելաս Ուոլեսին վրաերթի է ենթարկում Corner of Atwater & Fletcher Drive., LA, CA հասցեում գտնվող խաչմերուկին:
Շատ խուլ վայր էր, բայց մի 10 րոպե նկարվում էինք, նույնիսկ խցանման պատճառ դարձանք: Կարևորը, մեզ վրաերթի չենթարկեցին:
Վրաերթից հետո Բուտչն ու Մարսելասը հայտնվում են Maynard's Pawn Shop անունով լոմբարդում՝ շատ տխուր հետևանքներով… Զեդի համար: Շինությունը գտնվում է 20933 Roscoe Blvd. Canoga Park, LA, CA հասցեով, կոչվում է Crown Pawn Shop: Ու էլի «չոլ» տեղ է՝ Լոս Անջելոսի հեռավոր արվարձանում:
«Սպանել Բիլին։ Մաս 1» (Kill Bill: Volume 1, 2003) ֆիլմի սկզբում Հարսնացուն սպանում է Վերնիտա Գրինին, ով իր ընտանիքի հետ ապրում է Պասադենայում՝ Ջիննի Բելլ անունով: Տունը գտնվում է 5506 Atlas St. Pasadena, CA հասցեով:
Two Pines Chapel եկեղեցին, որտեղ տեղի է ունենում անասելի դաժան կոտորածը, գտնվում է 198th St. East, Lancaster, CA հասցեում՝ Լոս Անջելեսից մոտ 90 մղոն հեռավորության վրա: Լրիվ ամայի, անապատ մի վայր, իսկ շինությունը՝ փակ ու անխնամ:
«Կատաղած շներ» (Reservoir Dogs, 1992) ֆիլմի սկզբում կերպարները սրճարանում քննարկում են Մադոննայի Like a Virgin երգը: Սրճարանը կոչվում է Pat and Lorraine's Coffee Shop, գտնվում է 4720 Eagle Rock Blvd. Eagle Rock, CA հասցեում:
Իսկ «Մի անգամ Հոլիվուդում» (Once Upon a Time in Hollywood, 2019) Ռիք Դալթոնը հանդիպում է Մարվին Շվարցին Musso and Frank Grill մեքսիկական ռեստորանում. Շվարցը հասկացնում է Դալթոնին, որ իր՝ աստղ լինելն այլևս անցյալում է, ու եթե դերասանն ուզում է շարունակել կարիերան, պետք է նկարահանվի Իտալիայում:
Դրանից հետո խիստ հուզվաքծ ու տխրած Դալթոնը դուրս է գալիս ռեստորանից իր ընկերոջ ու դուբլյորի՝ Քլիֆ Բութի հետ: Շինությունը գտնվում է 6667 Hollywood Blvd., LA, CA 90028 հասցեում:
Ռիդլի Սքոթի կուլտային «Շեղբի վրայով վազողը» (Blade Runner, 1982) կիբերպանկի վերջում Ռիկ Դեկարդը կռվում է Ռոյ Բատտիի հետ, որի ավարտին Ռոյը հնչեցնում է իր լեգենդար մոնոլոգը: Bradbury Building-ը, որտեղ նկարահանվել է դրվագը, գտնվում է 304 S Broadway, LA, CA 90013 հասցեում:
Սա պատմական շենք է, լավ խնամված, սակայն մուտքն ազատ է. ցավոք, ոչ վերևի հարկերը, որոնք փակ են:
Ռոբերտ Զեմեկիսի «Վերադարձ դեպի ապագա» (Back to the Future, 1985) ֆիլմում դոկտոր Էմեթ Բրաունի տունը նույնպես էքսկուրսիաների հայտնի վայր է: The Gamble House-ը գտնվում է 4 Westmoreland Place, Pasadena, CA 911031 հասցեում:
Եթե հիշում եք, նույն Զեմեկիսի «Ֆորեսթ Գամփ» (Forrest Gump, 1994) ֆիլմում գլխավոր հերոսը իր երկարատև վազքը ավարտում է նավամատույցի մոտ՝ հայտարարելով, որ հոգնել է: Santa Monica Pier նավամատույցը գտնվում է 200 Santa Monica Pier, Santa Monica, CA 90401 հասցեում:
Ապագայից ժամանած մարդասպան ռոբոտի մասին Ջեյմս Կեմերոնի հռչակավոր «Տերմինատորը» (The Terminator, 1984) ֆիլմի սկզբում Առնոլդ Շվարցենեգերի մարմնավորած T-800-ը մերկ քայլում է Գրիֆիթի աստղադիտարանի հետևի հատվածում՝ մինչև փանքերի խմբին հանդիպելը:
2800 E Observatory Rd, LA, CA 90027 հասցեում գտնվող աստղադիտարանը շատ հայտնի վայր է, միշտ մարդաշատ, բայց մարդիկ մեծամասամբ հետաքրքրվում են բուն աստղադիտարանով, ոչ թե հետևի տարածքով, որի իսկական արժեքը գիտեն միայն կինոսերները:
Իհարկե, նման ուղևորության ժամանակ անհնար էր չայցելել Academy Museum of Motion Pictures թանգարան, թե չէ էլ ի՞նչ կինոսեր: Հասցեն՝ LACMA West, 6067 Wilshire Blvd, LA, CA 90036:
