🖼️ #մշակութաPAN (137)

Մշակութային շաբաթը՝ մեր մշակութասեր գործընկերոջ հետ

Ամենաուշագրավ իրադարձությունների մասին…

🎻 Դասական երաժշտությունից…

▪️ Եթե կարծում էիք, թե դասական երաժշտությունը սերնդափոխության հետ կորցնում է իր հանդիսատեսին, ապա սխալվում էիք: Վերջին հետազոտությունները ցույց են տալիս անսպասելի միտում. 35 տարեկանից ցածր երիտասարդներն ավելի հաճախ են դասական երաժշտություն լսում, քան իրենց ծնողները: Պարզվում է` սթրիմինգ հարթակների, կինոերաժշտության և սոցիալական մեդիայի շնորհիվ Մոցարտն ու Բեթհովենը նույնքան արդիական են ականջակալներում, որքան համերգասրահներում՝ https://tinyurl.com/95vr5msh

▪️ Քվանտային ֆիզիկայից մինչև տիեզերական տարածություն, գիտությունը ոգեշնչել է բազմաթիվ կոմպոզիտորների և ստեղծել յուրօրինակ երաժշտական աշխարհներ. դասական երաժշտության հանրահայտ այս ստեղծագործությունները պատմում են ԴՆԹ-ի «գաղտնիքների», աստղերի ծնունդի և մաթեմատիկական բանաձևերի մասին՝ վերածելով գիտական հայտնագործությունները մեղեդիների ու սիմֆոնիաների՝ https://tinyurl.com/mrx8pa9y

🇦🇲 Հունվարի 25-ին Կոմիտասի անվան կամերային երաժշտության տանը երգեհոնային երաժշտության համերգ է սպասվում. համերգը նվիրված է Կոնստանտին Մանուկյանի հիշատակին, ծրագրում՝ Յոհան Սեբաստիան Բախ՝ https://tinyurl.com/5n62ncxu

🎶 Ժամանակակից երաժշտությունից…

▪️ Քանթրի երաժշտության պատմությունը վերագրվում էր 1920-ականներին, մինչև Փենսիլվանիայում հայտնաբերված երաժշտական «գտածոն» փոխեց ամեն ինչ. Thompson's Old Gray Mule երգը՝ ձայնագրված 1891 թվականին նյուօռլեանցի երգիչ Լուի Վանյեի կատարմամբ, այժմ համարվում է պահպանված ամենահին քանթրի երգը: Archeophone Records ընկերությունը վերականգնել և թողարկել է այս եզակի ստեղծագործությունն ու նոր շունչ տվել ամերիկյան երաժշտական պատմության մաս դարձած երգին՝ https://tinyurl.com/yc3392cy

▪️ Հինգ տասնամյակ առաջ՝ 1965 թվականին, Բոբ Դիլանն աշխարհի ամենաոճային երաժիշտներից էր. այսօր Դիլանի երգերն ու նրա կերպարը նոր շունչ են ստանում սոցիալական մեդիայում, և այս անգամ դրա «մեղավորը» Թիմոթի Շալամեն է ու Դիլանի մասին պատմող A Complete Unknown ֆիլմը: Լեգենդար երաժշտի ստեղծագործությունները նոր լսարան են գրավում՝ ծանոթացնելով Z սերնդին ամերիկյան երաժշտության մեծագույն արտիստներից մեկի հետ՝ https://tinyurl.com/4xnh834y

🇦🇲 Համերգ՝ The Beertles-ի կողմից. հունվարի 24-ին The Beertles-ը ելույթ կունենա Hard Rock Cafe Yerevan-ում: Խոստանում են լավ միջավայր ու որակյալ երաժշտություն՝ https://tinyurl.com/427hat4w

🎬 Կինոյից…

▪️ Դեմի Մուրն իր չորս տասնամյակ ձգվող կարիերայի ընթացքում առաջին անգամ, գուցե, Օսկարի առաջադրվի, իսկ Կիրան Կալկինը հավանական մրցանակակիրների թվում է՝ A Real Pain ֆիլմում իր դերի համար. Օսկարի այս տարվա հավակնորդների անունները պարզ կդառնան մի քանի օրից, իսկ մինչ այդ՝ հիշեցում այն դերասանների և արժանի դերակատարումների մասին, որոնց աշխատանքներն այս տարի մնացին ստվերում՝ https://tinyurl.com/ycyp3yus

▪️ 1999 թվականին ստեղծված ռոմանտիկ կատակերգություն, որն այսօր էլ շարունակում է մնալ այս ժանրում բոլոր ժամանակների ամենագեղեցիկ աշխատանքներից մեկը. «Նոթինգ Հիլը» նախ հմայում է իր «առօրեական» մանրուքներով, հետո ստիպում հավատալ, որ հեքիաթները կարող են իրական լինել, ու վերջապես թույլ է տալիս երկու ժամ և չորս րոպե կտրվել միապաղաղ իրականությունից ու վայելել ամենաիսկական «feel-good» ֆիլմ՝ https://tinyurl.com/3yzn2f5e

🇦🇲 Հայաստանի ամերիկյան համալսարանում կցուցադրվի «Պղտոր Ջրեր» (Dark Waters) ֆիլմը. հանրային առողջության, բնապահպանական հարցերի և դրանց ազդեցության մասին ֆիլմը կցուցադրվի հունվարի 24-ին՝ https://tinyurl.com/5dpyeywx

📚 Գրականությունից…

▪️ 1949 թվականին լույս տեսած «1984» վեպի հեղինակի հիշատակը հավերժացվում է բրիտանական մետաղադրամի վրա. Ջորջ Օրուելի մահվան 75-ամյակին ընդառաջ Թագավորական դրամահատարանը թողարկում է նոր հուշադրամ, որի վրա պատկերված է տոտալիտարիզմի թեման խորհրդանշող դիզայն: Մետաղադրամի եզրերին փորագրված են հեղինակի հայտնի «Մեծ եղբայրը հետևում է քեզ» ու «Կար ճշմարտություն և կար սուտ» խոսքերը՝ https://tinyurl.com/bddsjjhr

▪️ 2006-ի գրականության Նոբելյան մրցանակակիր Օրհան Փամուքը բացահայտում է իր տաղանդի մեկ այլ կողմ ևս. նախքան գրող դառնալը, նկարիչ դառնալու երազանք ունեցած Փամուքը ցուցադրում է վերջին տասնամյակում իր ստեղծած նկարների հավաքածուն՝ հույս ունենալով, որ «իր մեջ ապրող նկարիչը չի մահացել»: Նրա ծոցատետրերը լի են էսքիզներով, որոնք արտացոլում են վերջին տարիների ամենատարբեր իրադարձություններ՝ https://tinyurl.com/2s3eh723

🇦🇲 Գրիբոյեդովյան ընթերցումներ՝ Երևանում. հունվարի 15-ին կայանալիք միջոցառմանը կներկայացվեն Ալեքսանդր Գրիբոյեդովի քիչ հայտնի ստեղծագործությունները, որոնք կօգնեն բացահայտել մեծ դրամատուրգի ստեղծագործության նոր կողմեր՝ https://tinyurl.com/34b4tea8

🏛️ Կերպարվեստից…

▪️ Լոնդոնի Ազգային պատկերասրահն առաջին անգամ իր պատմության մեջ այցելուների համար դռները բացում է նաև գիշերային ժամերին. Վան Գոգի ստեղծագործություններին նվիրված ցուցահանդեսը, որն արդեն դարձել է տարվա ամենապահանջված մշակութային իրադարձություններից մեկը, հասանելի կլինի նաև գիշերային ժամերին: Տոմսերի աննախադեպ պահանջարկին ի պատասխան, թանգարանը որոշել է արվեստասերներին հնարավորություն տալ՝ վայելելու վարպետի կտավները նաև լուսաբացին՝ https://tinyurl.com/5n8y9a64

▪️ Բարոկկոյի հանճարեղ վարպետ Ռուբենսը միայնակ չէր ստեղծում իր արվեստը. Մադրիդի Պրադո թանգարանում բացված նոր ցուցահանդեսը բացառիկ մանրամասնությամբ ներկայացնում է 16-17-րդ դարերի արվեստանոցների ֆենոմենը և համատեղ ստեղծագործական գործընթացը: Առաջին անգամ հանրությունը ծանոթանում է, թե ինչպես էր Ռուբենսն աշխատում իր օգնականների հետ ու ստեղծում բոլոր ժամանակների լավագույն կտավներից մի քանիսը՝ https://tinyurl.com/4exr8cf3

🇦🇲 Հունվարի 24-ին կկայանա Ամասիա Նիզիբլյանի «Մարմնիրավ» ցուցահանդեսի բացումը. մարմինը վերածվում է ինքնության, հիշողության և պատմությունների հարթակի, մազերը հանդես են գալիս որպես անցյալի ու ներկայի կապող խորհրդանիշներ: Նկարազարդ գրառումները կուղեկցվեն ինստալյացիաներով՝ հրավիրելով խորհելու մարմնի պատմությունների վերաիմաստավորման մասին՝ https://tinyurl.com/396cjwv6