🖼️ #մշակութաPAN (140)

Մշակութային շաբաթը՝ մեր մշակութասեր գործընկերոջ հետ

Ամենաուշագրավ իրադարձությունների մասին…

🎻 Դասական երաժշտությունից…

▪️ Դասական երաժշտության մեղեդիները հաճախ դառնում են ժամանակակից հիթերի հիմք, բայց շատերն անգամ չեն էլ նկատում այդ կապը. Բիլլի Ջոելը, օրինակ, խոստովանել է, որ չի կարողացել դիմադրել Բեթհովենի մեղեդիներին, իսկ Լեդի Գագան իր հիթերում օգտագործել է ջութակի դասական սոլոներ: Առաջարկում ենք բացահայտել 19 փոփ երգերի անսպասելի կապը դասական երաժշտության հետ և ծանոթանալ, թե ինչպես են ժամանակակից աստղերը վերաիմաստավորել այդ մեղեդիները՝ https://tinyurl.com/3j2yb9aw

▪️ Երբ Բեթհովենը ղեկավարում էր իր Յոթերորդ սիմֆոնիայի պրեմիերան 1813 թվականին, նա արդեն գրեթե չէր լսում, բայց ստեղծագործությունն այնքան էներգետիկ ու ռիթմիկ էր, որ Վագները հետագայում այն անվանեց «պարի աստվածացում». Սիմֆոնիան առաջին անգամ հնչեց բարեգործական համերգի ժամանակ՝ նվիրված վիրավոր զինվորներին, իսկ Բեթհովենը սուր ձևակերպումների փոխարեն նախընտրեց ասելիքը տեղ հասցնել երաժշտության միջոցով՝ https://tinyurl.com/4rwudy6d

🇦🇲 Փետրվարի 7-ին «Արամ Խաչատրյան» համերգասրահում Հայաստանի ազգային ֆիլհարմոնիկ նվագախմբի և դաշնակահար Դմիտրի Մասլեևի կատարմամբ հնարավորություն ունեք միանալու տիեզերական երաժշտական ճանապարհորդության. Ծրագրում՝ Հոլսթ՝ «Մոլորակներ», ինչպես նաև Ռախմանինով՝ Դաշնամուրի կոնցերտ թիվ 3՝ https://tinyurl.com/3t45ncdy

🎶 Ժամանակակից երաժշտությունից…

▪️ Նինա Սիմոնի երաժշտական ժառանգությունը յուրահատուկ մարտահրավեր է ցանկացած երգչի համար, նրա հզոր ձայնը, վիրտուոզ դաշնամուրային կատարումները և ժանրային բազմազանությունը դժվար է կրկնօրինակել. Լոնդոնյան համերգի ընթացքում հինգ տաղանդավոր երգչուհիներ փորձել են վերստեղծել ոչ թե Սիմոնի կատարողական տեխնիկան, այլ նրա հուզական անկեղծությունը. Ունկնդրեք և գնահատեք ժամանակակից երգչուհիների մեկնաբանությունը՝ https://tinyurl.com/2jcsc4x8

▪️ Բազմաթիվ երաժշտասերներ անարդար էին համարում, որ Բեյոնսեն երբևէ չէր արժանացել «Գրեմմի» մրցանակաբաշխության գլխավոր՝ «Լավագույն ալբոմ» մրցանակին. Այս «պատմական սխալն» ուղղվեց 67-րդ «Գրեմմիում», երգչուհու Cowboy Carter ալբոմը դարձավ լավագույնը, իսկ երգչուհին նախկինում չորս անգամ զիջել էր այս անվանակարգում՝ https://tinyurl.com/ybyvntbx

🇦🇲 Պրոգրեսիվ ռոքը համարվում է ռոք երաժշտության ամենահամարձակ ու փորձարարական ճյուղերից մեկը. Փետրվարի 6-ին Hard Rock Cafe Yerevan-ում երեք երիտասարդ խումբ՝ Arravis-ը, Edenlost-ը և Sevagir-ը, կցուցադրեն ժանրի ամբողջ էներգիան ու բազմաշերտությունը՝ https://tinyurl.com/43u9m5n5

📚 Գրականությունից…

▪️ Ջեյն Օսթինի կյանքի որոշ դրվագներ մինչև օրս էլ մնում են առեղծվածային, և պատճառներից մեկն այն է, որ գրողի քույրը՝ Կասանդրան, որոշել էր ոչնչացնել Օսթինի նամակների մեծ մասը. Նոր հեռուստասերիալը փորձում է բացահայտել այս պատմության մութ էջերն ու, մասնավորապես, անդրադառնում 1796 թվականի նամակներին, որտեղ երիտասարդ Ջեյնը պատմում է իր սիրո մասին: Ի դեպ, այսօր կան պնդումները, որ քույրը ճիշտ է վարվել ու նամակները ոչնչացնելն ամենաօպտիմալ որոշումն էր՝ https://tinyurl.com/msatb9jc

▪️ Ամստերդամում գտնվող մի գրասենյակային շենքի գաղտնի հարկը, որը երկու տարի ապաստան էր դարձել 13-ամյա Աննա Ֆրանկի և նրա ընտանիքի համար, առաջին անգամ վերստեղծվել է իր իրական չափերով, ոչ ավել, ոչ պակաս՝ Նյու Յորքում. Աննա Ֆրանկի տուն-թանգարանի այս նախաձեռնությունը թույլ է տալիս այցելուներին «հայտնվել» այնտեղ, որտեղ աղջիկը գրել է իր հայտնի օրագիրը՝ նկարագրելով թե՛ թաքստոցի առօրյան, թե՛ իր երազանքները, որոնք վեր էին այդ սահմանափակ միջավայրից` https://tinyurl.com/4ca43xw5

🇦🇲 Հունարենի համաշխարհային օրվա շրջանակում Հայաստանի հունական համայնքների միությունը փետրվարի 9-ին հրավիրում է հույն մեծ գրող Նիկոս Կազանձակիսի գրականությանը նվիրված «Կազանձակիս․ ակնթարթից հավերժություն» խորագրով միջոցառմանը, որի ընթացքում դաշնամուրի ուղեկցությամբ կհնչեն հատվածներ գրողի ստեղծագործություններից հունարենով և հայերենով` https://tinyurl.com/4mddev82

🏛️ Կերպարվեստից…

▪️ Միքելանջելոյի 550-ամյակի նախաշեմին Վիրջինիայի արվեստի թանգարանում տեղի է ունենում մի բացառիկ իրադարձություն՝ առաջին անգամ ԱՄՆ են բերվել Սիքստինյան կապելլայի առաստաղի և «Ահեղ դատաստան» որմնանկարի նախապատրաստական էսքիզները. Թանգարանի համադրողի տիտանական աշխատանքի շնորհիվ այցելուները հնարավորություն կունենան տեսնելու 25 բացառիկ գծանկար, որոնք բացահայտում են Վերածննդի հանճարի ստեղծագործական գործընթացը՝ https://tinyurl.com/mrxxntxt

▪️ Լուվրի ամենահայտնի բնակիչը՝ Մոնա Լիզան, վերջապես կունենա իր սեփական սենյակը. Ֆրանսիայի նախագահ Էմանուել Մակրոնը, արձագանքելով հաստատության վիճակի և տարեկան միլիոնավոր այցելուներին սպասարկելու դժվարությունների մասին մտահոգություններին, հայտարարել է Լուվրի մասշտաբային վերանորոգման մասին, դե իսկ Դա Վինչիի կտավը կտեղափոխվի հատուկ նախագծված սրահ, որը կբարելավի թե՛ այցելուների փորձառությունը, թե՛ այս գլուխգործոցի պահպանման պայմանները՝ https://tinyurl.com/4xvf8a6v

🇦🇲 Փետրվարի 7-ին Հայաստանի պատմության թանգարանում կկայանա լրագրող, գրող, Երևաի մեծ գիտակ Մարկ Գրիգորյանի բանախոսությունը՝ «Մայր թանգարան, մայր հրապարակ․ 20-րդ դար» խորագրով՝ https://tinyurl.com/2ddnc9xc

🎬 Կինոյից…

▪️ Երբեմն կարիերայի ամենախիզախ որոշումները կարող են դառնալ ամենահաջողվածները. Ջեֆ Դենիելսը պատմում է, թե ինչպես՝ հակառակ իր գործակալների խորհրդին, համաձայնեց խաղալ «Հիմարը և ավելի հիմարը» ֆիլմում ու միացավ Ջիմ Քերիին: Դերասանը բացահայտում է ֆիլմի անմոռանալի պահերը՝ իր կերպարի սանրվածքից մինչև հայտնի զուգարանի տեսարան ու հոր արձագանք՝ https://tinyurl.com/3dy6nf5b

▪️ Օսկարի մրցանակաբաշխությունը Հոլիվուդի, գուցե, ամենակարևոր երեկոն է, բայց դրան հասնելու ճանապարհը հաճախ լի է սկանդալներով ու PR աղետներով. Ֆիլմերի ստեղծողներն ու դերասանները հաճախ հենց իրենք են վնասում սեփական հաղթանակի հնարավորություններին՝ անհաջող սոցցանցային գրառումներով, հարցազրույցների ժամանակ թույլ տված վրիպակներով կամ PR թիմերի չափազանց ագրեսիվ ռազմավարությամբ: Առաջարկում ենք բացահայտել Օսկարի պատմության ամենաքննարկված ինքնասաբոտաժի դեպքերը՝ https://tinyurl.com/mv2mcddj

🇦🇲 Փետրվարի 7-ին կարող եք մասնակցել զրույցի, որը համեմված կլինի ֆիլմի դիտմամբ և ձայնային պերֆորմանսով. Երեկոյի ընթացքում մասնակիցներին սպասում է զրույց Ֆիլիպ Ռոթի՝ հայերեն նոր թարգմանությամբ «Մեռնող կենդանին» վեպի և դրա հիման վրա նկարահանված իսպանացի ռեժիսոր Իզաբել Կոյշետիի «Էլեգիա» ֆիլմի շուրջ` https://tinyurl.com/3f47ts37